تعلیمی حکام کی جانب سے پریکٹیکل امتحانات 2026 کے حوالے سے اہم اپڈیٹ جاری کی گئی ہے، جس میں نمبروں کی تقسیم اور پاسنگ کے اصول کو واضح کیا گیا ہے۔ اس اقدام کا مقصد امتحانی نظام کو مزید شفاف اورمنظم بنانا ہے۔ اعلامیے کے مطابق پریکٹیکل امتحان میں کل 30 نمبروں کی تقسیم اس طرح ہوگی کہ 16 نمبر ایگزامینر کے پاس ہوں گے، جن میں وائوا (Viva)، پرفارمنس اور کاپی چیکنگ شامل ہے، جبکہ باقی 14 نمبر بورڈ کی جانب سے تحریری شیٹ کی جانچ کے بعد دیے جائیں گے۔ نئے قواعد کے تحت سائنس مضامین میں طلبہ کے لیے پریکٹیکل میں کامیابی کے لیے کم از کم 10 نمبر حاصل کرنا لازمی قرار دیا گیا ہے، بصورت دیگر طالب علم کو ناکامی کا سامنا کرنا پڑ سکتا ہے۔ حکام نے طلبہ کو ہدایت کی ہے کہ وہ اپنی پریکٹیکل کاپیاں مکمل اور صاف ستھری تحریر میں تیار کریں، جبکہ وائوا کے لیے بنیادی سوالات اور فارمولے اچھی طرح یاد رکھیں تاکہ بہتر کارکردگی دکھا سکیں۔ ماہرین کے مطابق ان تبدیلیوں کا مقصد طلبہ کی عملی صلاحیتوں کو بہتر انداز میں جانچنا اور امتحانی معیار کو مزید مؤثر بنانا ہے، جو تعلیمی نظام میں بہتری کا باعث بنے گا۔